قصيدة نادرة من تأليف خادم الحرمين الشريفين...

[الفيلسوف]

((قصيده نادره لـ خادم الحرمين الشريفين الملكفهد بن عبد العزيز حفظه الله ..))

عندما كان مريضا في لندن في شهر شوال من عام 1385هجري
حيث بعثها إلى المرحوم الأمير فهد بن سعد يشكو فيها
قسوة المرض حيث قال :



يا بو سعد صارت على أخوك غارات

..................................شهرين أقاسي من شديد الغرابيل

سوالمرض يحمل على أخوك حملات

..................................مافي يدي حيله ولا في يدي حيل

والله فزع من فوق سبع السماوات

.................................وأنا أحمد الله يوم صارت تساهيل

ماينفع الخايف والأيام عجلات

....................................الخوف ماينفع ولا القول والقيل

حنا هل العوجا ولابه مراوات

...............................شرب المصايب مثل شرب الفناجيل

لاشك أنا مشغول في كل الأوقات

............................على الذي حنـــــــــا بظله رجاجيل

ماني على نفسي كثيرالحسافات

.............................لا سلم راسه روسنا رفاع با لحيل

حامي حمانا بالليالي المخيفات

..............................لو صار بالــــــعالم كثير الزلايل

فخر العروبه بالعدل والمساواه

............................هذاك هو فيصل ولا فيه تشكيل

يشهد له اللي شاهدوا منه ليات

..............................ويشهد له التاريخ جيل بعد جيل

القائل
خادم الحرمين الشريفين
الملك فهد بن عبد العزيز ال سعود

[ تم التعديل بواسطة الفيلسوف في 2005/9/29 14:37 ]

[صقر]

السلام عليكم

هل هذي اول قصيده له والا؟

سؤال من وين هالخبر :oops




وشكرا على الموضوع : d_clap

[الفيلسوف]

[admin]

[جزيل]

رحمك الله واسكنك فسيح جناتة
اااااااااااااااااامييييييييييييييييييييييييييييين

[أبوفيصل]

مشكور يالفيلسوف ..
لكن عندي تساؤل ليش ما كملتها وجبت الرد على القصيدة ؟؟

وبعد اذنك انا اجيبه نيابة عنك :

أجابه الامير فهد بن سعد رحمه الله بهذه القصيده :

يامرحبـا بكتاب زبـن المـخـلات
................. اهـلا هلابـه عـد وبـل الهماليـل
حمـدت مـن زال الكـدر بالمسـرات
.................فكاك مـن صكـت عليـه المحابيـل
فـزع لـك اللي عالم بالخفـيـات
................. مبري جروح ايوب غيـث المراميـل
لعل مايزعج علـى فقـدك اصـوات
................. ولعلهـا لـك يابـو فيصـل تماهيـل
الله يجيرك مـن صواديـف الافـات
.................عسـاك تسلـم ياعشيـر المشاكـيـل
ماانت برخيـص ياربيـع القرابـات
................. لو هي بالايدي كان دونـك حلاحيـل
ترا لنا بـك يافتـى الجـود هقـوات
................. في وقتنا الحاضـر وباللـي مقابيـل
يفـداك ربـع قصـروا بالمهـمـات
................. اللي علـى القـالات ماتنطـح الشيـل
بعض العرب حي ومن عرض الاموات
................. مايرتجـي نفعـه بحـل المشاكـيـل
وفيصـل ذرانـا بالسنيـن المخيفـات
.................هو درعنا الضافي اليا ضدنـا الميـل
اللـي نقـل عنـا حمـول ثقـيـلات
................. راس الحصيـل ان كملـن المحاصيـل

[ تم التعديل بواسطة أبوفيصل في 2005/8/4 20:59 ]